இன அழிப்பிற்கு நீதிகோரி யாழ்ப்பாணத்தில் நாளைமறுதினம் சனிக்கிழமை நடைபெறவுள்ள எழுச்சிப் பேரணிக்கு யாழ்.பல்கலைக்கழக ஊழியர் சங்கம் ஆதரவு தெரிவித்து அறிக்கை வெளியிட்டுள்ளது.

அந்த அறிக்கையில் தெரிவிக்கப்பட்டுள்ளவை வருமாறு,

நாளைமறுதினம் (16) சனிக்கிழமை காலை 10 மணிக்கு ‘நீதிக்காய் எழுவோம்’ என்ற இன அழிப்பிற்கு நீதிகோரி மாபெரும் மக்கள் எழுச்சிப் பேரணி யாழ்ப்பாண பல்கலைக்கழக முன்றலில் இருந்து மாநகர சபை மைதானம் (சுப்பிரமணியம் பூங்கா முன்பாக) நோக்கி நடைபெறவுள்ளது.

இது தொடர்பில் தெளிவுபடுத்தும் விளக்கங்களும் விவரங்களும் பல்கலைக்கழக மாணவர்களாலும், பல்கலைக்கழக சமூகத்தினராலும் ஊடகங்களுடாக வெளியிடப்பட்டுள்ளன.

இதற்கு பல்கலைக்கழக ஊழியர் சங்கமும் முழுமையான ஆதரவினை வழங்குவதோடு பல்கலைக்கழக ஊழியர்கள் மற்றும் பல்கலைக்கழக சமூகத்தினர் உள்ளிட்ட அனைத்து தமிழ் மக்களையும் அணிதிரண்டு பங்கேற்குமாறு வேண்டுகின்றோம் – என்றுள்ளது