இலங்கையில் போதைப் பொருள் குற்றங்கள் தொடர்பாக மரண தண்டனை விதிக்கப்பட்ட 4 பேரை தூக்கிடுவதற்கான ஆணையில் இலங்கை ஜனாதிபதி மைத்திரிபால சிறிசேன கையெழுத்திட்டுள்ளார்.

இன்று காலை ஜனாதிபதி இதனை ஊடகவியலாளர்களிடம் உறுதிப்படுத்தியுள்ளார்.

4 பேரைத் தூக்கிலிடுவதற்கான ஆணையில் தாம் கையெழுத்திட்டுள்ளேன் எனவும், அவர்களுக்கு விரைவில் தண்டனை நிறைவேற்றப்படும் என்றும் தெரிவித்துள்ளார்.

இலங்கையில் தேசிய போதைப்பொருள் தடுப்பு வாரம், ஜூன் 23ஆம் திகதி தொடக்கம், ஜூலை 1ஆம் திகதி வரை கடைப்பிடிக்கப்படுகிறது.

இதனை முன்னிட்டு 13 மரணதண்டனைக் கைதிகளைத் தூக்கிலிட அரசாங்கம் திட்டமிட்டுள்ளதாகவும், அதனை உடனடியாகத் தடுத்து நிறுத்துமாறும் அனைத்துலக மன்னிப்புச் சபை கோரியிருந்தது.

எனினும், நேற்றிரவு 8 மணி வரை, கைதிகளைத் தூக்கிலிடுவது தொடர்பாக ஜனாதிபதி செயலகத்தில் இருந்து எந்த தகவலும் தனக்கு அனுப்பப்படவில்லை என, சிறைச்சாலைகள் ஆணையாளர் கூறியுள்ளார்.