வவுனியாவில் பெரியளவிலான சூரிய சக்தி மின் உற்பத்தி நிலையம்

வவுனியாவில் பெரியளவிலான சூரிய சக்தி மின் உற்பத்தித் திட்டம் ஆரம்பிக்கப்படவுள்ளது. இதன்மூலம் உற்பத்தியாகும் மின்சாரம் வவுனியா மக்களுக்கும் வீதி விளக்குகள் மற்றும் வழிபாட்டுத் தலங்களுக்கு விநியோகிக்கப்படவுள்ளது என்று மின்சக்தி அமைச்சுத் தெரிவித்துள்ளது.

இதுதொடர்பில் அரச தகவல் திணைக்களம் வெளியிட்டுள்ள செய்தியில் தெரிவிக்கப்பட்டுள்ளதாவது:

இலங்கை முதலீட்டு சபையில் பதிவு செய்யப்பட்டுள்ள Vydexa (lanka) power corporation (Pvt.) Ltd என்ற நிறுவனம் சூரிய சக்தி மூலமாக 10 மெகா வோல்ட் மின் உற்பத்தித் திட்டத்தை வவுனியாவில் காத்தான் சின்னக்குளம் என்ற இடத்தில் ஆரம்பிக்கவுள்ளது.

இந்த தொகுதி திட்டம் 54 ஏக்கர் நிலப்பரப்பில் உள்ள கிராம மக்களுக்கு முழு அளவில் மின்சாரத்தை வழங்கக்கூடிய திட்டமாக முன்னெடுக்கப்படவுள்ளது. இந்த திட்டத்துக்கு நாளாந்தம் சூரிய ஒளி முறையாக கிடைப்பதற்கான வசதிகள் இங்கு இருப்பதாக அடையாளங்காணப்பட்டுள்ளது.

இந்த திட்டத்தின் மூலம் 3 ஆயிரத்து 800 மெற்றிக்தொன் டீசல் மூலமாக பெறப்படும் மின்சாரத்திற்கான செலவு சேமிக்கப்படுவதாக சுட்டிக்காட்டப்பட்டுள்ளது.

வீதி விளக்குகள் வழிபாட்டு தலங்களுக்கான மின்சாரம் உள்ளிட்ட உள்நாட்டு உட்கட்டமைப்பு வசதிகள் இச்செயற்திட்டத்தின் மூலம் மேம்படையக் கூடியதாக இருக்கும் என எதிர்பார்க்கப்படுகிறது -என்றுள்ளது.